|
14.05.2007
Serokê Kurdistanê Mesûd Barzanî duhî
bersîva wan destên qirêj yên li pişt
terora li Mexmûrê da û got ev teroreka
bêçare ye û bi ser nakeve. Serokê
Kurdistanê êrîşa terorîstî ya ko duhî li
Mexmûrê li himberî baregehê PDK-ê hatî
kirin û di encamê de 32 kes hatîn kuştin
û 115 kes birîndar bûyîn şermezar kir û
hevxemiya xwe bo kesûkarên kuştî û
birîndaran diyar kir, sersaxî ji bo
kesûkarên kuştiyan xwest û hêvî kir ko
birîndar bi rojekê zûtir sax û selamet
bin.
Serokê Kurdistanê Mesûd Barzanî di heman
demê de mesajeka vekirî bo wan destên
qirej yên li pişt vê terorê da û got ev
karê terorê yê ko dê bi ti awayî bi ser
nekeve li dijî binecihkirina madeya
140-ê û li dijî bihevrejiyana birayetiyê
têt kirin.
Mesûd Barzanî got yên ko destên wan di
van karên terorîstî de hene ew dê
bigîhin cezayên xwe yên yasayî.
Ji aliyê dî ve balkêş e, otomobîla ko
teqemenî lêbarkirî bû û berî nivro li
gorî demê Hewlêrê seet 11.30-ê li ber
baregehê PDK-yê Mexmûrê ji aliyê
terorîstekê xwekuj ve hatî teqandin,
otombîleka leşkerî ye û ev coreyê
otomobîlan hêj nû di nav leşkerê Iraqê
de hatiye belav kirin. Terorîst bi xwe
jî bi cilûbergên leşerî bûye.
Wesa diyar e ko êdî karên terorîstî bi
nav, bi cil û bi navgînên/amûrên Iraqê
yên fermî tên kirin.
Mexmûr jî hêj di bin îdareya Iraqê de ye
û qedera wê jî bi binecihkirina madeya
destûrî ya Iraqê ya 140-ê ve girêda ye
ko li gorî vê madeyê divê di meha 12-yê
ya vê salê de referandum bêt kirin û
Kerkûk jî tê de deverên derveyî îdareya
Kurdistanê mane, bi referandumê vegerin
ser îdareya Kurdistanê.
Serweriya Kurdistanê bo vê bênavbir
hewil dide. Mebestek ya serokê
Kurdistanê Mesûd Barzanî ji serdana
Ewropayê jî ew bû ko ewropiyan di heqê
referandumê de qane bike. Ewropî qane
bûn an no em wê nizanin.
Lê helwestên derveyî çi dibin bila bibin,
asta êrişên qirêj jî li çi radeye
disekinin bila bisekinin, miletê kurd û
serweriya kurd qet qebûl nake referandum
bêt bi paş xistin. Serokê Kurdistanê
Mesûd Barzanî jî di hemî temasên xwe yên
Ewropayê de îşaret bi vê heqîqetê kir û
got:
— Em bi ti awayî qebûl nakin ko hinek li
ser me ferz bikin ko em referandumê bi
paş ve bidin. |
-----------------------------------------------------------------------------------------vegere |
