12.09.2007

Hesen Eli--- Hewlêr--- Dema di aliyekî de xebatên bo modernîzekirina artêşa Kurdistanê berdewam dibin, dewreyeke leşkerî ya li fergeha Leşkerî ya Pêşxabur li Zaxo bi dawî bû. Di dewrê de, pêşmergeyên girêdayî Hêzên Zêrevanî yên Kurdistanê hatin perwerde kirin.

Dewreya perwerdê, berî sê heyvan bi navê “Xola 11 Eylûlê” hatibû dest pê kirin  û 1100 pêşmergeyên Zêrevanî yên Kurdistanê tevlî vê dewreyê bibûn. Pêşmergeyan di vê dewreyê de ji bilî perwerdeya leşkerî, dersên weke Dîroka Kurdistanê û Cografya Kurdistanê jî xwendin.

Dewra perwerdeya ku ji destpêkê heta evro bê rawestan tijî derbas bû, li fergeh leşkerî Pêşxabur girêdayî Zaxo bi rewresmeke derçûnê bi dawî bû.

Nûnêrê serokê Kurdistanê Mesûd Barzanî General Şehab Ahmed, berpirsiyarên Liqên 1, 8 û 20î yên PDKê, Fermandeya Dihokê, efser û serleşkerên Artêşa Kurdistanê, nûnêrên Dezgeha Eylûlê yên Dihok û Zaxo, nûnêrên Tevgera Jinan, rayedarên navenda Laleş, nûnêrên Yekîtiya Nivîskarên Dihokê; efser, pilêdar û Fermandeyê Giştî yê Pêşmerge Zêrevanî ya Kurdistanê û hejmareke zêde ji nûnêrên Hirîstîyan û Ezdiyan û gelek mêvan  tevlî rewresma derçûna xolê bûn.

Fermandê Fermandeya Pêşmergeyên Zêrevanî yên Kurdistanê Azîz Weysî di axaftina xwe ya destpêkê ya rewresmê de êrîşên 11 Eylûlê riswa kir û perwerde û jiyana leşkerî weke bilind nirxand.

General Weysî got: “Dahatuya welatekî girêdayî asta leşkerî ya wî welatî ye. Artêşeke baş perwerdebûyî, ku hemû rêgez û qeîdeyên leşkerî bicih tîne û bersiva hemû pêwîstiyên jiyanî di hemû sehayan de dide, garantiya dahatuya wî welatî ye. Em weke hêza Zêrevanî, di sehaya zanistiya leşkerî de bi hezaran pêşmerge û efser perwerde kirin, di nava du salan de 25 xolên perwerdeya leşkerî yên cuda rêxistin kirin, bi vî awayî me pêwîstiyên artêşeke modern û standart bicih anîn ku ew dê dahatuya welatê me garantî bike û biparêze. Evro di çarçoveya vê xebatê de 1100 pêşmergeyên me yên profesyonel ji xola leşkerî derdiçin û piştî perwerdeyeke sê heyvan dest bi wacibê leşkerî dikin. Ez heta dawiyê bawer im ku hemû pêşmerge û efserên me dê li gorî armancên gel û welêt bin, layiqî navê pêşmergayetiyê bin û welatê xwe biparêzin. Ez serkeftinê ji bo hemû pêşmergeyên Kurdistanê dixwazim.”

Piştî axaftina general Azîz Weysî, bi musiqaya bandoya leşkerî, meşa rewresmî ya leşkerî dest pê kir. Di dawiya rewresmê de komandoyên Zêrevanî xwepêşandaneke Kung-Fu pêşkêş kirin.

Di derçûna xola perwerdê ya Zêrevanî de, ji bilî çapameniya herêmî, gelek rojnemavanên Ewrupî û Tirkî ji amade bûn.

-----------------------------------------------------------------------------------------vegere