23.11.2006 Sexan

Şexan/ Hesen Eli--- Li gorî dirêjahiya sîyaseta avakirina biratî û dostaniya miletan ji Hikumeta Herêmî ya Kurdistanê, xebat ne tenha li nav sînorên Kurdistanê yên hûkûmî, lê li dereweyî sînoran jî berdewam dibin. Hikumet hewl dide ku dostanî û biratiya miletan û ayîniyên dî bi Kurdan re, bi şewazekî rastî were pêkhînan.  

Li dwif şîretên Seroke Hikumeta Herêmî ya Kurdistanê birêz Neçîrvan Barzanî, Fermandê Fermandeya Pêşmergên Zêrevanî yên Kurdistanê General Azîz Weysî û şandeka pê re, çûn seredana Şêxan û bi efser û giregirên herêmê re civînek berfireh çêkirin. Di civînê de birêz Matran Nîxa û gelek şexsiyetên dî yên ayînî jî amade bûn.

 Di roja 22'yê Novembera 2006an, General Weysî bi nûnêr û pêşhatîyên kêmnetewan, bi gelek efser û navdarên Krîstiyan, Êzdî, Aşurî û Kildaniyan civînek çêkir û li arîşeyên wan guhdarî kir. Li civîna ku li Kenîseya li nawçeya Şêxan de birêveçû gelek kes ji miletên krîstiyan, Êzdî, Aşurî û Kildanî  tevlî bûn. Fermandê Fermandeya Pêşmergên Zêrevanî yên Kurdistanê General Azîz Weysî di axaftina xwe de li ser biratiya misilmanan û kemnetew û grûbên ayînî yên dîtir rawesta û weha got: "Li dijberî rejîma dirinde ya Seddam, gelên Kurd, Êzdî, Aşurî û Kildanî û Tirkman, çi krîstiyan çi misilman, çi Êzdî çi Kildanî, pêkva berxwedan kir. Me hemî pêkva êşa vê berxwedanê kêşa û serberzî, şanazî û serkeftina vê berxwedan û têkoşînê jî, emê careka dî pêkva jiyan bikeyn."  

General Weysî diaxaftina xwe de got ku ew ne li ser navê hizbekî, lê belê li ser talîmata Hikûmeta Hêremî ya Kurdistanê li vêderê amade ye ku arîşeyên gelên dost û bira guhdarî biket û bo çareseriya pirsgirêkan wana bibe bo Hıkumeta Herêmî ya Kurdistanê. Fermandeyî Giştêi yê Pêşmergên Zêrevanî yên Kurdistanê General Azîz Weysî got: "Ne bes tenê li Hikumeta Hêremî ya Kurdistanê, lê heta li Hikumeta Iraqê jî em dê hewl bideyn ku arîşeyên we bên zanîn û ji bo çareseriyê werin nîqaşkirin."

Piştî wergirtina hizr û pêşniyarên civakê, General Weysî soz da ku van hizr û pêşniyara bighînîte Hikumeta Hêremî ya Kurdistanê. Gelek kes ji civînê kêfxweşiya xo hînan ziman û hêvî kirin ku ev cure hewl û xebat berdewam bin. Efser û pêşhatiyên gel, spasiyên xwe pêşkêşî Hikumeta Herêmî ya Kurdistanê kirin bi riya birêz General Weysî.  

Civîn bi nanxwarinekî û bi kefxweşiya beşdaran bidûmahîk hat.

Hêjayî gotinê ye ku Şêxan di sata hikumî de girêdayî Hikumeta Iraqê ye û bi gelek muşkuleyên civakî, siyasî rûbirû ye. Gelek xizmetên tebîî yên wekî avakirina rê û bingehên nawçê heta roja evro kêm mane. Herçend Şêxan di asta hikumî de ne li naw erkên Hikumeta Herêmî ya Kurdistanê de bit, dîsa jî Hikumeta Kurdistanê bi arîşeyên ev civak û kemnetewan eleqedar dibe.

-----------------------------------------------------------------------------------------vegere